قســـم القصائد الشعبية

قصائد غزل - قصائد عتاب - غربة -

لفطاحلة الشعر الشعبي العراقي

الشاعر عماد الدراجي

وسام منحوت
هيعونه اليموت ايجوز يرتــــــــاح
ولا عيشة مذله وناصي الصوت
كون الصوت يوصل فوگ الغيوم
ويرسمله گمر متعلي عالـــحوت
لتلوم الگلب لو باح الأســـــــــرار
لجل سرّك وصلته اهواي للموت
وماگلته وعارك بالينـــــــــــشدون
عشت سرّك وسام بگلبي منـحوت
باليد حيله ماخلولي يـــــــــــــفلان
انه الصوتي رعد ويصير بسكوت
طگن بالگلب كون من الأرمــــاح
ما واحد نبت كلهن گبل فــــــــوت
من گلبي طلع سري عبث عـــــود
بس گلبي وحگك نخت منخـــــوت
فرق بين الأجن يمشن مطيعــــات
وفرق بين الأجن جايبهن الحــــوت
وفرق بين الزرع بستانه واطــــاه
وفرق بين الزرع بس ما وجد قوت
وفرق بين العثگ كون الحمل بيه
وفرق بين العثگ لو حمله منكوت
قارنت الظروف البيها مريـــــــت
الك وتريد ازيدك شعر وبيــــــوت
لوم الناس بـــــــــيه معذب الروح
ودليلي اعليك خايب دومه مكبوت
علي حكم الاعدام اتصدره الاقزام
ومحضرين چفني وحتى تابــــوت
حسبتك عالحبل سيف انته الصير
يوم اللي تشوفه بنحري مليـــــوت
موش اتهد علي ويه اليهـــــــدون
وتركض عالدليل اتگطع البـــتوت

انتهينه
وانتهى
الما ينتهي وخلَّص حچينه
انتهينه
وبقت
كَطرات الوفه المذبوح تتناثر علينه
وبقت
للمجفين كوم اسرار عد روحي الامينه
وكون ندري
بالعتاب يفيد بيهم عاتبينه
وكون يسوون
البچي
چا بثنعش
ناظر بچينه
غافلونا
وباگو
العشرة غفل من بين أدينه
وباگو من
ايد العمر سنتين وبوجهم رضينه
تالي نزعوا
شوگنا من گلوبهم
وگالوا
عوض عنكم لكَينه
تالي سدوا
بابهم من شافوا عالباب اجينه
شكَكَوا مكتوبنه
وبلا خجل ذبو علينه
تندمينه
جينه
بجنازة عشكَنه المات غفله وأيّسينه
وابتعدنا
بعيد لكن طيفهم ظل يعتنينه
ظلت
حجاياتهم عالبال ما جلمه نسينه
ياما لسعتنا الشمس وبفي كَصايبهم غفينه
يامافيَّضنه الوفه وحطّولنا المهجة سفينه
ياما ذبنه
العطش يمهم وبجدح جفهم روينه
تالي نزعوا
شوگنا من كَلوبهم
وگالوا
عوض عنكم لكَينه
تندمينه
جينه
بجنازة عشكَنه المات غفله وأيّسينه
وابتعدنا بعيد
لكن طيفهم ظل يعتنينه

ما مرتاح ...

عيوني تستحي بس الدموع " وكاح "
ما مرتاح
منّك : منّي
من العدل .... من الــ مات
من الجاي : من الــــ راح

ما مرتاح

عركه اويه الزمن..... ورجعنه مكسورين
وبعيده المسافه..... وينسى الــــي طاح

ما مرتاح

لأن شفت الشمس نزلت تبوس " الگاع "
وبچف الطفل تنلاح
ولأن قاضي البلابل مدد التوقيف
ومفتوحه السما
والفيل عنده جناح !

ما مرتاح

لإن قفل المحبه " إنباگ "
وترهم عليه مفتاح

ما مرتاح

متروك بجزيره وتيهت بالليل
وإجو ربعي عليه بـــ.. قافلة أشباح
وإنته إشبيك ؟!!
لمّن دافعت عن نفسي صابك غيض
مو حتى الگنافذ من تحس بـــ.. الخوف
تستخدم جلدها سلاح ْ

ما چن الفجر ....مثل الفجر محبوب
لون الفجر صاير يقبض الــ أرواح

رجعت الستاره بــ حرگــه عالشباج
ورثيت الورد ... وبچيت
من شفت الندى فوگ المدافع
طاح

دايخ بالحلم ...
يمكن خبر موزين
مات الزرع كله وما بچه الفلاح

وبالليل المناجل تنغسل بالماي
ودم يابس عليها ...!!
وبالغسل .... ما راح

فزيت الصبح
شفت الحلم مذبوح
وبعيني نسه سجينته الــ ذباح

ما مرتاح
من وگــفوا على الصوبين
ما مرتاح

تمساح بــ..نهرهم صاحوا من الخوف
وجازفت بــ..حياتي من سمعت ...." صياح ْ

صارعت المنيه وبيده هزني الموت
ومدمَى طلعت
صفگوا للــ.. تمساح

كل هذا وتريد أرتاح ْ

مامرتاح ْ

قل شوف السفينه .... والضباب يزيد
وسيوف الملامه بچلوة الملاح !!
يا سن الصخر .... وتكسرت
بالروج !!

مو جنت بزمانك ترهب السفان
من جوه الثلج...
وجفوف ايديك أرماح

ما مرتاح من ربعي .... ولا مرتاح
نادوني وركضت بــ.. ليل
إيد الرسن بيها .. وإيد بيها سلاح
عثرت مهرتي ...
وربعي گبل ما أطيح
واحد قال للـــــ ثاني :

أبشرك طاح...ابشرك طاح

الشاعر كاظم أسماعيل الگاطع

الغربه

بالغربة شفت التعب وتعلمت معناه

وتعلمتعا عالسهر
والسكتة والصفناه
ذليت ذل النهر من ينكطع مجراه
واعرفت .. كل شي عرفت
حتى النخل ينحني
الريح السفر من يجي
وجايب غريب وياه

• **
الله يا هالوطن شمسوي بيه الله
نيرانه مثل الثلج
كلما تدگ الضلع .. ابرد وگول اشاه
• **
اللي مضيع ذهب بسوگ الذهب يلگاه
واللي مفارگ محب
يمكن سنة وينساه
بس المضيع وطن
وين الوطن يلگـــــــــــــــــاه
اه يا وطن يا خبز .. يا لشارتك تكتل
يا وطن يا زفة گمر
ونجوم إله تهلهل
عذبني .. ما عذبك
أكتلني .. ما اكتلك
طبع اليحب ينكتل .. موش اليحب يكتل
• **
اه يا وطن يا جذر
والجذر طبعه قوي
بالريح ما يجفل
اه يا وطن يا جبل
ياجبـل ياجبـــل

والجبل من عادته
لو مات من العطش للوادي ما ينزل

والجبل من عادته
لو مات من العطش للوادي ما ينزل

• **
علمني الفراگ
اعزف لحن غربتي بقيثارة اشواگ
واسهر واحن وانفعل واتمنى واشتاگ
علمني الفراك
ما مش مثل ديرتي ولا نلكة مثل عراگنا
عــــــــــــــــــــــراگ

.......................

الشاعر كاظم أسماعيل الگاطع
أعله صدرك مشتهي النوح

أريد أبجي إعله صدرك مشتهي النوح

و أريـد أگعد إگبـالك وأحسب إجروح

ومثل الطير من يودٌع الروح

جاي أرگص إبابك رگص مذبوح !!

إهي كسرة عظم ماتجبــَر بيوم !!

ولا دورة سنه وآثارها تروح

كِسروا واهسي وخلوٌنــي مالوم

وخايف عله عيوني بالبچي إتروح

چنت آمر وأنهي وصاحب الراي

يوم أييـــدي طويله وچيلتي إتلوح

أريــد أبجي إعله صدرك مشتهي النوح

وأريد أگعد إگبــالك وأحسب إجروح

أريد أركي أعله صدرك راس تعبــان

وأسولف عن عذابي وغربة الروح

جاي أنزع إبچـَفٌك سهم الأصحاب

تبروا من طحت عافوني مطروح

سحگوا فوكَ راسي وجرهم الخوف

ونزلو للوحَلْ من عالي السطوح

ويوم إلليٌ شفتهم وكَعو إبٌيـــر

نزلت وساعدتهم وآنـــه مطروح

ويوم إللٌي شفتهم نزفوإ هــواي

گمت إنطيت دم واحلبت الجروح

أريد أبچي إعله صدرك مشتهي النوح

وأريد أگعد إگبالك واحسب إجروح

الشاعر الكبير عريان السيد خلف
لاتتمنه

يا گلبي لا تتمنه
ماطول جافانه الهوى وبطلنه
لاعين ضلت خاليه
ولا ضل ولف يتعنه
لا تدگ يلــ دگك قهر
مقفول باب الجنة
وهينوب مامش ضنه
اه يا وكتنه الماصفت نيته وزرگ عينه النه
طحنه بوسط شلوة هفه وكل ذيب يبرز سنه
ردنه نگف ونهوش نحمي الروح ما امچنه
وأنته بجلادة عين صحت اكلنه
وما طول راضي بموتنه استاطنه
اه يا خسارة نوحنه ويا رخص ذيج الونة
ردفن علينه أسهامكم وعله الصبر دامنه
لا أحنه للدنيه صفينه ولا هوى الدنيا النه
متبدل بطبعه الوكت لو أحنه التبدلنه
اه يا هواهم بأول أيامه شكثر دللنه
ومن وصل طينتهه الظهر كلهه تبرت منه
لا سالفة بشفة محب لا عاذل اليعذلنه
أوحشت دنيانه ابد چنهه ابد موش النه
متبدل بطبعة الوكت لو احنه التبدلنه

الشاعر عبدالله موحان

طبع الشمع

عاجبني طبع الشمع بالليل من يشتعل
يضوي بدرب ناسه
ومن يطر وجه الصبح
ناسه تجازيه نفخ
حد ما تگص راسه
الشجر ابيّض گلب بالفاس من ينكسر
يصبح الفاسه ظهر
ما يغدر ابفاسه
ودموعي لمه الحزن
ضاگ ابجرحها الالم
من گعدت بكاسه
وحلمي قصر من ورق
والوسطه عايش هوى
وهد للقصر ساسه
البلبل احساسه ترف
لو شاف فلاح اجه
وبجدامه داس الورد
يتدمر احساسه
والنهر اصل الكرم
من نشف مايه وعطش
تاليه يبچي بقه
چي شاف ماي النهر
ما يترس الطاسه

وبالك يطير الشمع
تگعد بعش الشمس
لن نار عش الشمس
يوصله محد گدر
وچف الغروب اوصله
ومن فوگ غصن السمه ذبّاه لمن جاسه
وبالحلم مرّه شفت
چن انه عشت ابوكت بيه عشگ ما مسموح
والعشگ فوگ الورد
شفته اعله ادين الحقد
من الصبح مذبوح
وعلمي الي من الزغر
منقوش فوگ الحجر
شفته بدين الجهل يا حسرتي ممسوح
والما يلوح العنب
شفته انه ادينه اتلوح
وطب الجروح الملح
بس ذره فوگ الجرح يشفى الجرح ويروح
وبريل هذا الوكت
گامت سنين العمر
تمشي بحزن وتروح

زعلان بس يازعل لمن ترد للصدگ

گبل المنادي اجي..وشلون جيه اجي اركض ركض محترگ

ياللذتك بريتي..وين الگه مثلك هوى لولاك والله اختنگ ...

هي شراكة نفس لو سكت گلبك سكت گلبي و يدگ لو يدگ ...

لو ما وكتنا صعب ما چان ابد نفترگ كلمن مشى لحالته ...

واحد سكن بالغرب وواحد سكن بالشرگ

وكل هالمسافه..البعد وسوالفك تنسمع چن احنا حلگ بحلگ

چنت انه الوم النخل لومن ادين السعف بالريح يوگع عثگ

بس جربته وشفت شفت العطش لو هجم اول ضحية العرگ

بعدك صدگ حاولت نمت وي غيرك سنة وفزيت چني بحلم

شابگ جروحي شبگ

بعدك صدگ حاولت ولگيت مرسى بجرف بحر العيون الزرگ

ولگيت في وعطر عد الشعرها فرگ بس مالگيت الوفه

والله عشگنا عشگ ...

يامن مگدر علي غيرك فصاله صعب چم دوب اخيط واشگ

ما اظم عليك الجدم غمض عيونه ومشه وداني واني بطرگ

شفة واذن تستمع للي اخذو غيبتك مجبور افضي الخلگ

واچاتل وي الحچي والخيل داست علي سحگت ضلوعي سحگ

اصحى براسي انطعن اسكر رمح بالگلب وبين الصحى والسكر

رمحين صفن طبگ

عنت علي شوفتك ..وصبرت بس ماصبر گلبي وصرخ..راح اطگ

جاباني الك واذعنت جيتك بليلة شته ظلمه ومطرها رشگ

واشبعده صار الدرب..خوف ورعيد وثلج وچفوف ادية زرگ

ببابك طحت ها گمت ...ظميت ادية وردت عالباب بالروح ادگ

بس گالو المن تدگ كلمن مشى لحالته ..واحد سكن بالغرب وواحد

سكن بالشرگ ..

تغطيت وبعدني الليلة بردان
لان مو يمي انته فراشي بارد
وينك يا دفو ياجمر الاحزان
احس بدمي بالشريان جامد
يامهر الصبر ماكظك عنان
نسمع بس صهيلك وين شارد
كلساع وتعتني جفوف بطران
وانة جلد العلية قماشة بايد
انسحبو من حياتي هواية خلان
وبقيت ابهل الزمان لوحدي اعاند
سواد الليل يبقة وتطفة الالوان
واعيد بذكرياتك والمشاهد
علة بير المنايا وجيت عطشان
مجبور وشربت الماي راكد
وياك بعشرتي ياليل خسران
مثل عشرة الماي وية الكواغد
اذا كل طير عندة ثنين جنحان
انا مجبور وعشت بجناح واحد
طال العمر صار خيوط كتان
كلما تنعكد بالجر تعاند
عيد وصبحت بوجه دفان
عايدني وكلت المن تعايد
محد عرف نقطة ضعف الانسان
وقيمتها بسعر دمعة الوالد
تغطيت وبعدني الليلة بردان
لان مو يمي انته فراشي بارد

طور الحزن

يا هيه.....
ياطور الحزن
موالك يفزز حنين الروح ويبجيني
يا هيه .....
ذبوني طفو
هفتو جمر سنيني
ريشه وتهت بالريح
هاي سنين
واني الوني الهوى ويلويني
امزوهر
طفح بيه الدمع
لا شبجه
لا فالة رحم تخطيني
ما فادن اسدود الصبر
فاضن سواجي ونيني

يا هيه .....
مر اعله الجرف
واطلع واجيك بطيني
وافرش حمل شوكي ابشليلك
حته
اطلعلك سوالف كفرني بديني
عيدين مرن عالعشج
وانه الحزن جاسيني
صوف ابحلك مغزل صرت
وشما فرغ ...
يطويني

يا هيه .....
لو نام الجفن
وتوسد الدمعات
سالوفة هوى توعيني
واكعد ....
واجر يا هيه
ذبوني طفو هفتو جمر سنيني
بس جمرة التذكار
ظلت واجه وتجويني

مطار يا غيم الجفن
ليله افيضن
واسبح بمي عيني
خشبه ....
ويزتني السيل
والحسره بحزن تحديني
عود وشرب مايه الصبر
واتغربلت بالظيم
يرياح الهجر
نسفيني
طشيني ويه الريح
بلجي انزل ولم اسنيني

يا هيه .....
دينت العمر
وشلون اردن ديني
ومرخوص...
غني بلا حرج
اطرب على الحسرات اضن تدريني
لا تحترك وياي
خليني
احترك خليني
ريشه وتهت بالريح ....
هاي سنين
وانه الوي الهوه و..... يلويني
ما فادن اسدود الصبر
فاضن سواجي ونيني

» قســـم الأبوذية